A cinefilia de @roicou

★10/10 - Serie épica de ciencia ficción que segue a un grupo de exiliados na súa loita por salvar a humanidade e reconstruír a civilización durante a caída do Imperio

Delicia visual e narrativa

Como gran amante da ciencia ficción e da obra de Isaac Asimov, decidín mergullarme nesta serie. A primeira intención é separarme o máximo posíbel das novelas, xa que se trata máis dunha creación inspirada nelas que dunha adaptación fiel, polo que hai que ignorar o canon e todas esas cousas.

Foundation de Apple TV é unha ambiciosa adaptación das aclamadas novelas de Isaac Asimov. A diferenza das adaptacións literais, esta serie toma liberdades creativas para explorar novos ángulos e profundidades dos personaxes e a trama, o que a fai única e emocionante para tanto os fans das novelas como os novos espectadores.

A serie tamén destaca pola súa produción visual e os seus efectos especiais. Cada episodio é unha delicia visual, con escenarios detallados e efectos que transportan ao espectador a un futuro distante e complexo. A banda sonora, composta por Bear McCreary, complementa perfectamente a narrativa, engadindo unha capa adicional de emoción e tensión.

En canto ao reparto, Jared Harris está espectacular no seu papel de Hari Seldon, mais aquí quen brilla por riba do resto é Lee Pace no seu papel de Brother Day facendo unha delicia de actuación impecábel. Tamén merecen mención Lou Llobell e Leah Harvey, que aportan profundidade e carisma aos seus respectivos personaxes. A química entre os actores é palpábel e cada un deles aporta algo único aos seus roles.

Como punto negativo, temos o caos absoluto de saltos temporais onde a única áncora que temos é o número de Emperador Cleon no que estamos nese intre. Por sorte son sempre cara adiante, polo que nun segundo visionado da tempada podemos atoparnos máis cómodos á hora de saber cando están ocorrendo os feitos e en que punto da historia imos.

Pero, aínda que os saltos temporais poden ser confusos, tamén son un reflexo da complexidade da obra de Asimov. A serie intenta capturar a escala épica das novelas, onde os eventos se desenvolven ao longo de séculos. Isto, aínda que desafiante, tamén é un dos aspectos máis fascinantes da serie, xa que permite explorar como as accións dun personaxe poden ter repercusións ao longo de moitas xeracións.

O argumento é pura ciencia ficción, sen demasiada acción, mais sen facerse nin sequera un pouco pesado en ningún momento. Temos numerosas tramas paralelas que nos teñen enganchados en todo momento onde conseguimos querer e odiar a tódolos personaxes nalgún momento da tempada. Conseguen que empaticemos con viláns e detestemos a heroes xusto despois de ter o sentimento contrario. Todo para chegar a un final de tempada absolutamente brillante onde conseguen que desexemos comezar xa a segunda tempada.

Foundation non só é unha serie de ciencia ficción emocionante e visualmente impresionante, senón tamén unha reflexión profunda sobre a natureza da humanidade, o destino e o libre albedrío. É unha serie que nos desafía a pensar, a sentir e a cuestionar, o que a converte nunha obra mestra do xénero. Sen dúbida algunha, unha das grandes obras da televisión dos últimos anos.