A cinefilia de @roicou

★9/10 - Un espía sen memoria, unha trama de infarto e acción da boa. Prepárate para viaxar polas rúas de Europa con Jason Bourne.

Un gran thriller que non se pode deixar pasar

A verdade é que The Bourne Identity é desas pelis que te deixan pegado á cadeira de principio a fin. Non é só un filme de acción calquera; a min pareceume incríbel, sobre todo polo ben coidado que está todo. A trama, sacada dun libro, está tan ben adaptada ao cine que parece feita á medida. Non dá un minuto de respiro, pero sen aturullar. É das que che fan pensar, pero tamén gozar cos ollos abertos.

E falando de gozar, as escenas de acción son un espectáculo a parte. Esquezámonos de acrobacias imposíbeis ou efectos especiais que cantan por si sós. Aquí a cousa vai de realismo puro e duro. As pelexas, as persecucións… todo está rodado de xeito que parece que estás no medio da liorta. Iso fai que sexa moito máis críbel e, polo tanto, moito máis emocionante. Dá gusto ver como están traballadas as coreografías para que se sintan tan críbeis.

Un dos maiores acertos, para min, é Matt Damon. Ti dis, Matt Damon, o de Good Will Hunting, facendo de axente secreto? Pois si, e encaixa coma un guante! Aínda que nunca foi un actor de acción puro e duro, aquí borda o papel. O seu Jason Bourne é carismático, vulnerable e letal á vez. Consegue transmitir esa confusión e urxencia que sente o personaxe, facendo que empatices con el dende o primeiro minuto. É imprescidíbel para o filme, sen dúbida.

E xa para rematar, un detallazo que me alucinou foi o coidado coas localizacións. París, Zúrich… ves as cidades e sentes que estás alí. Non é só un fondo; forman parte da historia. E iso de ver os coches típicos de cada sitio, os uniformes de policía de cada lugar, transporte público, etc. demostra o cariño que lle meteron á produción, facendo que a experiencia sexa moito máis inmersiva e notábel. Un goce para os ollos e para a inmersión na historia. É, sen dúbida, un filme admirábel.