Mission: Impossible (1996)
A primeira misión que consolidou a Tom Cruise como rei do cine de acción e iniciou unha das maiores sagas da historia.
6 de decembro de 2025
★8/10 - A primeira misión que consolidou a Tom Cruise como rei do cine de acción e iniciou unha das maiores sagas da historia.
A orixe dunha lenda da acción
Este filme non é só a primeira entrega dunha das maiores sagas do cine de acción, é a película que marcou o inicio da consolidación de Tom Cruise como o gran referente do xénero. Cando a valoramos hoxe, debemos ter en conta o contexto da época, e por iso esta primeira misión recibe un merecido 7/10. É a película que sentou as bases do que viría despois, presentando un Tom Cruise en estado puro, listo para subirse ao trono do cine de acción.
O filme conta cun reparto que, ademais de Cruise, sorprende polas súas eleccións. Destacan nomes como Jon Voight e, especialmente, Jean Reno. Chaman a atención varios actores europeos en papeis clave de axentes da CIA, mais encaixan perfectamente na trama e dánlle un toque distinto á produción.
O argumento é un clásico do xénero: un axente secreto, neste caso Ethan Hunt, é incriminado e usado como cabeza de turco para roubar información clasificada. Unha premisa sinxela pero eficaz que, baixo a dirección de Brian De Palma, se desenvolve cun ritmo e unha intriga impecábeis.
En canto aos efectos especiais, son sorprendentemente bos para a súa época. A maioría deles resistiron moi ben o paso do tempo, o que se debe en gran parte a que a película aposta máis pola acción práctica que por un uso excesivo de CGI. Quizais os efectos do helicóptero son os que peor envelleceron, pero o resto continúan a ser totalmente críbeis a día de hoxe.
Se por algo destaca esta película é polas súas escenas icónicas que xa forman parte da historia do cine de acción. Quen non lembra a famosa escena de Ethan Hunt colgado dun arnés mentres se infiltra? Ou a espectacular fuxida do restaurante, co xigantesco acuario estoupando detrás del? Son momentos que demostran a audacia e o estilo visual que caracterizarían toda a saga.
En definitiva, unha gran primeira parte que soubo cimentar os alicerces dunha franquía que continúa a ofrecernos misións imposíbeis décadas despois.